معوض دخل الغيبوبة علي أمل .. ولو فاق هيموت من الصدمة

معوض عادل صديق قديم وطالب بصيدلة أكتوبر، إتصاب بطلق ناري في الجمجمة في محمد محمود في نوفمبر وهو في المستشفي الميداني ومن يومها وهو في غيبوبة.

معوض دخل الغيبوبة وهو علي أمل النصر .. كنا داخلين وحاسين أن دي نهاية المجلس العسكري … كانت بالنسبالنا حياة أو موت .. كان كل واحد فينا بيدخل وعارف إنه لو مات أو إتصاب كل اللي وراه هيكملوا ومش هيسيبوا حقه .. آخر حاجة شافها كان شارع مليان بغيوم الغاز وكلاب ألعسكر بيحروا للانتقام ومحاولة الحفاظ علي عرشهم.

معوض دخل الغيبوبة والأخوان بيحاربونا وبيقولوا أننا أصحاب أجندات لافساد صفو العملية الانتخابية ولوقف انتخابات مجلس الشعب.. شتمونا وأهانونا وخانونا وباعوا دمنا للعسكر.

إنهاردة وبعد اكتر من 8 شهور في غيبوبة .. لو فاق من الغيبوبة .. وعرف أن الإخوان اللي خانوا أصبحوا علي رأس السلطة مناصفة مع المجلس العسكري القاتل المجرم اللي أمر الظابط يضرب نار عليه !!

للأسف معوض لو فاق هيموت من الصدمة وأحنا السبب لأننا عجزة ومحققناش حلمة اللي دخل الغيبوبة وكنا وعدينه بيه .. وعدنا وإخلفنا واخترنا حياتنا وبعنا دم مصابينا وشهدائنا .. ربنا يرحمهم ويقوي أهلهم ويصبرهم.

تخيل معوض أول ما يفوق ويسأل أهله عن حاجة اسمها ثورة وعن ايه اللي حصله واللي حصل للبلد بعدها … جاوب انت وتخيل هو هيحصله ايه .. كنت الأول بقول يارب يقوموا بالسلامة .. لكن دلوقتي بقول يارب ما يفوق ويشوف اللي حصل.

Posted with WordPress for BlackBerry.

Categories:   ثورة مصر

Comments

  • Posted: August 6, 2012 19:33

    شخص ما يكتب || أه .. يا ولاد الصهاينة … « شخص ما يكتب

    [...] يااااه فلسطين,زمان وأنا صغير كنت بشوف اللي بيحصل وإزاي الصهاينة بيقتلوا الفلسطينيين بدم بارد وأقول ازااي قدر يعمل كده, اتعلمت اني لازم اواجه الظلم ولو هموت, ودار بينا الزمان ولقيت في كل شارع في مصر القدس وغزة والخليل والضفة, شوفنا كام محمد الدرة والمرة دي بعنينا مش من ورا تلفزيون, وكفاية معوض اللي دخل الغيبوبة علي أمل .. ولو فاق هيموت من الصدم.... [...]
  • Posted: September 26, 2012 19:11

    marwan adel

    maiten omak ya 3m 2nta , ya rb maifo2 ! abo om de m3rfa lly 3rfha m3wad a5oia b2shkal 2s5a

Leave a Reply