شخص ما يكتب | يوما ما سيكتمل القمر

حبيبتي .. 

ليلتك جميلة زيك ..

ماتقابلناش من فترة طويلة لدرجة اني لما بفكر في نفسي وقتها ودلوقتي بحس اني أتغيرت كتير, وبقول يمكن اتغيرتي, أنا بقيت أنضج وأهدى ورومانسيتي الزيادة تقريبا أختفت, أقصد الرومانسية نفسها مش الشوية الكتير الزيادة بس.

ليلي بقى زي نهاري, مش عارف بأعمل فيهم ايه بالظبط ولا الوقت بيضيع في إيه, بس اديني بجري جوه دماغي, زي ما المثل بعد تحريفه مابيقول “بروح النيل وبرجع عطشان”, يمكن عشان محتاج أروحله في الواقع؟ .. مش عارف.

يمكن أنا تايه عشان مابقتش أحلم, فاكره لما كانت أحلامي بتفرض نفسها على كل حوارتنا ؟ فاكرة لما كنت اقعد اقولك أنا بعد 10 سنين هبقى كذا وبعد 5 هبقى كذا؟ ولما كنت بكلمك عن الأحلام اللي نزلت من السما للأرض وبقت واقع عايشه؟

خلاص خلاص سيبك من الأحلام عشان متقلبش بنكد, عارفة حاسس وانا بكتبلك كده أني زي محمد العزبي في فيلم غرام في الكرنك لما كان بيغني لحتشبسوت والفرقة بتقوله “جرى إيه يابني سلامة عقلك, يظهر كده والله أعلم .. يوم الجمعة ده مش هيفوت” ..

أقولك على سر ؟ … الهوا اللي حواليا أشتاق لنفسك, أه والله .. وعيني كمان مشتاقة, بس روحي لأ, روحك مافرقتنيش مع كل الحاجات اللي بعدت..

يلا أسيبك تنامي وأشوفك في ليلة فيها القمر كامل .. وتنامي وتصبحي عليا ..

 

يوما سيكتمل القمر

يوما سيكتمل القمر

Categories:   هلفطة شخصية

Comments

Leave a Reply