شخص ما يكتب عن | حب وحلم وانفصال

ميدان التحرير الجمعة 1 فبراير - تصوير كريم فريد

ميدان التحرير الجمعة 1 فبراير – تصوير كريم فريد


‫في 25 يناير 2011 دخلت في قصة حب بمعنى الكلمة مع الثورة, القصة دي انتهت في فبراير 2012 وكل اللي بعدها ده خناقات مابعد الإنفصال .. لأنها اتجوزت واحد غيري.

خناقات ما بعد الإنفصال نادرا ما بتؤدي إلي الرجوع، حبها ضحيت عشانه بمليون حاجة وغيرني وغير حياتي ولكنها في الآخر باعتني وأنا اللي كنت مستعد اضحي  عشانها بحياتي  وعلى الرغم من كل البهدلة اللي شفتها بسببها كان عندي امل أن حب عمري يرجع يعيش من تاني ودار بينا الحوار ده “بيلخص المرحلة اللي أحنا فيها”‬‬

‫‫

أنا: حبيبتي ماتيجي نرجع‪ ,‬ ده أنا الوحيد اللي اخلصتلك وحبيتك بجد‬‬

‫‫

هي: أجبروني على الجواز واللي بينا خلاص انتهى‪ ..‬‬‬

‫‫

ثورتي اللي حبيتها‪ ..‬ خانتني واتجوزت جواز صالونات, كنت بخلصلها وبس وماكونتش مستني منها حاجة‪ ..‬ بس هي اختارت اللي معاه الفلوس والقوة والدقن .. مشيت بمبدأ بنات كتير لما بيقولوا أنا عايزه اتجوز متدين عشان يراعي ربنا فيا.‬‬

‫‫

كنت دايما بتكلم معاها وإن كانت حبيبة افتراضية علمتني معني الحب المثالي, حب المبادئ وحب الأفكار, نسيتني السعي ورا الرغبة‪,‬ علمتني البراءة وقتلتها فيا بعدها وزرعت مكانها الألم.‬‬

‫‫

أول مرة نتقابل كنت حاسس وكأني أول مرة احب‪,‬ دخلت الميدان متوتر  قلقان احسن جوز أمها يشوفني وطبعا متوتر من اللقاء بس قعدنا مع بعض  ساعات كتير مروا وكأنهم دقايق‪,‬ ونسينا ان للناس عيون بتبص علينا وتحسدنا ولقينا الناس ابتدت تتكلم ويقولوا أننا ماشيين في الحرام وبعدها أبوها جالنا الساعة‪ 12‬ ونص وطردني وضربني‪,‬ بس كنت مصمم ورجعت رحتلها تاني وتالت ورابع وكل مرة اتضرب بس كنت مصمم اني لازم اكسب قلبها.‪ ‬‬‬

‫‫

عشت معاها في أول 18 ‪  من ارتباطنا أيام مثالية كنت بثبتلها فيها حبي وكنت بطلها الوحيد اللي جه بعد 30 سنة غياب,‬ زيها زي أي قصة حب اولها حلو وبعدها بيبدأ العذاب بمجتلف انواعه .. اوله اشتياق وأخره فراق.‬‬

‫‫

كنت دايما بحب أروح الاماكن اللي جمعتنا مع بعض بروح الميدان بروح محمد محمود وكرهت شارع القصر العيني لانهم  اتحرشوا بيها هناك وقدام عيني ويومها فقدت رجولتي بوقفتي عاجز مش قادر ولا أحميها ولا أغطيها.‬‬

‫‫

حتى ريحتها وريحة انفاسها كنت بجري عليها واحنا مع بعض كنت بعشقها وبعد ما سيبنا بعض حسيت قد إيه كانت مقرفة‪,‬ كنت بشم الغاز ده ليه وإزاي‪ !!‬‬‬

‫‫

صدق اللي قال الحب اعمي‬‬

‫‫

عدت علينا أيام كتير‪,‬ أيام بنضحك وأيام بنتخانق وبنعيط وكنت دايما أقول دي سنة الحياة مفيش اتنين دايما كويسين والأصحاب ابتدوا يتوسطوا وأتاري أبودقن كان عيينه عليها‪ ,‬ مااهتمتش ساعتها ونسيت وقولت لنفسي بلاش الشكوك والأوهام دي‪,‬ ده صاحبك ده اللي كان معاك أول مرة قابلتها ده اللي كان كتفه في كتفك‪ ..‬  وياريتني كنت صدقت اللي قال مفيش صاحب يتصاحب, راح من ورايا وكان بيقابل جوز أمها عشان يرتبوا الجوازة وطول الفترة دي كانوا بيوهموني اني خطيبها وحبيبها وانها ليا واني ليها مهما حصل‪.‬‬‬

‫‫

قصتنا مفيش كلام يقدر يوصفها وإن كنت دلوقتي بتكلم بسخرية عن اللي فات فالذكريات مؤلمة جدا, اخواتي ماتوا عشان تكون ليا وهي دلوقتي ولا هي معايا ولا هم معايا, واللي فاضلي … ذكريات  الغدر والخيانة.‬‬

‫‫
وزيها زي أي قصة حب بين اتنين بعد ما بتنتهي وبعد ما بتمر بفترات ألم بتبتدي تفكر في اللي فات وتقيم التجربة وتفكر بعقل بعد شهور كنت بتتحرك ورا عاطفتك .. العاطفة وبس اللي كانت بتحركني .. وهنا برضة إفتكرت جملة ناس كتير بتقولها ” فكر بعقلك متفكرش بقلبك” .

آخر حاجة‪ …‬ إن كنت بتضحك وانت بتقرا الكلام ده فاعرف ان ده بجد إحساس شباب كتير حبوا الثورة واتحركوا عشانها وكانوا بيحسوا بكل كلمة كتبتها‪ …‬ وأيوه أنا كنت بحس بده بجد‪ ,‬ الكلام ده مش ساخر ولا طريقة دي قصة حب حقيقية حصلت‪  ‬‬‬

الثورة كانت بالنسبالي فعل عاطفي وبس كنت حالم بحلم بمبادئ وبمثالية، دلوقتي مش ندمان ولا علي تضحياتي ولا علي أحلامي ولا علي حبي، ولكني ندمان علي إني مفكرتش بعقلي ومشيت ورا العاطفة.

يمكن لو كنت فكرت بعقلي كنت قدرت أحافظ علي حبيبتي معايا

في ناس لسه رافضة تعترف أنها خلاص راحت وفي ناس هتفتكر إني متشائم بس بالعكس أنا عندي أمل في إني هحب من جديد وهصلح كل غلطة غلطتها قبل كده .. بس ده مش قبل ما تمر فترة وأكون قدرت انسي الحب القديم وأقدر ابتدي من جديد.

Posted from WordPress for BlackBerry.

Categories:   ثورة مصر

Comments

  • Posted: January 25, 2013 11:24

    Israa El-sakka

    المشكلة أن دايما بيتقال أن كل جيل بيعمل ثورة واحدة بس ...يعني جيلنا على الأرجح مش حيحضر أي ثورة جديدة لا ناجحة و لا فاشلة ...يمكن الجيل اللي بعدنا يستفيد من نكباتنا و عندي سؤال : هو مين جوز أمها ؟ :D
    • Posted: January 26, 2013 22:54

      كريم فريد

      اكيد الجيل اللي جي هيستفيد، وعشان كده لازم نكتب عشان يتعلموا من تجربتنا. وجوز امها واضح يعني. . اللي نفخنا سنة ونص وسلمها تسليم اهالي :-D
  • Posted: February 6, 2013 13:44

    rowaidasamy

    Reblogged this on rowaideyat and commented: حنحب جديد :)

Leave a Reply