شخص ما يكتب | تصحبكم السلامة .. GO TO HELL

ساعات قاعد .. مش عارف أكتب .. مش عارف أنام .. بفكر .. بفكر ..

مفاهيم كتير اتشوهت وكلمات كتير من كتر ما استخدمت في غير مكانها ضاع معناها

عارف يعني إيه بني آدم ؟ يعني عندك إحساس وزي ما بتعطف وبتنسي وبتسامج وبتصبر، برضه بتتعصب وبتكره وبتغضب وبتنقم وبتاخد حقك.

عارف لما تحس أنك عايز تنتقم وفي نفس الوقت مش عايز تكون وغد وحقير ؟ عارف لما تتعصب وتحاول تملك اعصابك عشان ماتخسرش نفسك وتهين نفسك قدام نفسك ؟

طب عارف يعني إيه نفسك ؟

القتيل عندنا بيتقتل كتير, مرة بقتله ومرة بالمتاجرة بدمه ومرة بتحليل نيته وسبب موته ومرة بشتيمته وتشويهه ومرة بنسيانه بعد ما دمه يبرد .. إلخ

وأنا لما أتقتل كام واحد هيبرر موتي وكام واحد هيتاجر بدمي وكام واحد هيسب أهلي ؟ الشهادة زمان كانت فخر وشرف للي بينولها  دلوقتي حولتوها لعار.

مين قتل القتيل ؟ السؤال بقي أعمق وأصعب من اي وقت فات .. محتاج تفكر كتير قبل ما ترد .. الدم علي أيادي الكل ..

فعلا كل اللي محتاجاه البلد ان الكل يسكت .. الكل يسكت .. صباح الخير .. جو تو هيل

مش كان كفاية علينا الاحساس بتأنيب الضمير والعجز عن القصاص لرفاق المعمعة اللي سابونا في نص الطريق ووصيتهم أننا نكمل وعجزنا عن تحقيق حلمهم !!

ياريتني أتقتلت في 2011 .. وكنت واحد من المجهولين، أفضل مليون مرة من أني أكون في 2013 وأكون واحد من المتاجرين أو المبرراتية أو القتلة.

وهي الناس بقت إيه غير مثاليين أو مدعي مثالية أو متخاذلين أو هرايين أو متاجرين أو مبرراتية أو قتلة.

Categories:   ثورة مصر

Comments

Leave a Reply