سناء سيف هتحكيلهم عن غزة والمقاومة

كريم فريد و سناء سيف

في حرب 2012 علي غزة، سناء سيف كانت معانا في مستشفي الشفا في غزة، عشنا الحرب مع بعض في غزة وهنا.. 

مفتقد سناء، وكان زماننا دلوقتي بنفكر مع بعض هنعمل ايه عشان فلسطين ، كان زماننا دلوقتي في مظاهرة في التحرير أو معتصمين أمام معبر رفح، أو دخلنا بقافلة إغاثية لغزة. 

سناء كانت العضلات والمخ، دينامو الحماس اللي بيحركنا كلنا وأكيد هي مقهورة دلوقتي وبتحكي لرفاق السجن عن الحرب في غزة، بتعرفهم يعني ايه حرب وقصف وزنانات وكهربا مقطوعة معظم اليوم. 

 

اكيد هتعرفهم يعني ايه صاروخ من طيارة يوقع بيت علي اللي فيه. 

هتعرفهم الرعب مع صوت كل طيارة في السما. 

هتكلمهم عن حنظلة وعن الكوفية، عن غزة وخان يونس وبيت حانون، عن الشجاعية والزيتون. 

هتحكيلهم عن حماس وسخافة أجهزتهم الأمنية، وعن المقاومة بجد وصواريخها اللي بتطلع في كل وقت. 

هتكلمهم عن مستشفي الشفا وقوافل الشهدا والمصابين اللي بيوصلولها كل لحظة، وعن سارينة الإسعاف اللي مش بتسكت. 

هتحكيلهم عن غزة اللي بتتحول شوارعها لمساكن للأشباح مع الغروب، وعن المارة في الشوارع اللي بتستهدفهم الطيارات. 

هتعرفهم ازاي يتخفوا لو هينزلوا بالليل عشان ماتستهدفهمش الزنانة. 

هتحكيلهم عن أهل غزة الطيبين اللي ممكن يدوك كل اللي في جيوبهم وفي بيتهم. 

هتحكيلهم عن استقبال اهل غزة لينا وازاي شوفنا حبهم لينا في كل الشوارع كانوا بيرفعولنا علامات النصر ويحييونا. 

هتحكيلهم عن شوارع مليانة بصور الشهدا وحيطان عليها أمنيات النصر واحلام العودة وبتتغني بعشق المقاومة وكراهية المحتل. 

أحكيلهم يا سناء، أنقليلهم كل اللي عينك شافته في غزة، قوليلهم الهتافات اللي كانت بترج قلوبنا قبل ما ينطقها لسانا 

بنرددها جيل ورا جيل بنعاديكي يا إسرائيل

سامع صوت جاي من غزة سامع صوت كله عزة .. 

وسامع صوت جاي م الضفة .. الصهيوني لازم يتصفي

غزة يا غزة يا رمز العزة

بكره تخرجي يا سناء واحكيلك عن خيبتي واني مقدرتش أعمل حاجة لفلسطين في غيابك، بكره تخرجي وتحكيلي ازاي نقلتي للناس اللي شوفتيه في فلسطين. 

اكيد هتفرحي ان صواريخ المقاومة وصلت يافا وعسقلان وقساريا والقدس واكيد هتفتكر لما كنا مع بعض وبتنطط من فرحتنا بعد ما الصواريخ وصلت القدس في 2012.

اكيد في يوم انا وانت وكل رفاق قافلة غزة هنرجع من جديد لأرضها، وهنرجع نحتفل بانتصار المقاومة وعودة فلسطين، اكيد هتعود لأنك بتحبيها، واللي زيك وبيحب حاجة مستحيل يسيبها تضيع.

#GazaUnderAttack #فلسطين_تقاوم

**لينك للتدوينة على حسابي على فيسبوك

 https://www.facebook.com/Kareem.Emad.Farid/posts/10152524801490979

سناء سيف كريم فريد

Categories:   خواطر, هلفطة شخصية

Comments

Leave a Reply