ردا على عمي المؤيد لضرب غزة

الرسالة:

جيبت اللعنه لك ولأهلك ياكريم للاسف انت شايف الجهاد كلام وبس وبتدافع عن ناس بتاجر بأهلها علشان مصالحها وبس حماس وداعش وغيرها من الجماعات التكفيريه مش بتجاهد علشان نصرة الاسلام ولا نصرة الشعب الفلسطينى ده كلها شعارات كدابه وكلهم عملا لامريكا ولقطر وتركيا اللى انت بتقول عليهم وحاشا لله انهم يكونوا كذلك هم حمايتك انت واهلك وحماية مصر كلها والقطر العربى كله ولولاهم كنا بقينا زى ليبيا وسوريا اذا مكنتش عاجباك حمايتهم روح جاهد بنفسك مع حماس على الاقل تنول الشهاده او تنول شرف الجهاد ويتقال عليك فعلا انك مجاهد او يتقال عليك شهيد نال شرف الشهاده وهو بيدافع عن مبدأ للاسف انت ماشى مع الموجه وخلاص من غير فهم ياريت تعرف ترد على اللى سبك ولعن فى اهلك اللى مالهومش ذنب

لو كانت حماس فعلا قلقانه على الشعب الفلسطينى كانت وافقة على المبادره المصريه على الأقل لوقف نزيف الدم اللى بيدفعوا الشعب الفلسطينى وحده ولحد الآن مسمعناش عن واحد حمساوى استشهد لكن اللى استشهدوا هم المدنينن من الشعب الفلسطينى الى حماس عاملاهم دروع بشريه بتاجر بيهم لمصلحتهم

 

الرد:

عمو صفوت, أولا مساء الخير

ثانيا أنا مش شايف الجهاد كلام, ولو حضرتك ماتعرفش فانا ممكن اعرفك اني كنت في غزة وقت الحرب في 2012 وكنت في رفح من كام يوم وكنت معرض للموت قدام السفارة الإسرائيلية أكتر من مره, وقضيت سنتين من عمري بتبهدل في الشوارع عشان البلد دي.

ثالثا حضرتك ممكن تخلي خلافنا السياسي مع حماس على جنب لما يكون في ملايين البشر قاعدين في بيوتهم مستنيين الموت في كل لحظة, لما تكون الأرض شبعت من دم الفلسطينيين وتيجي تكلمني الكلام ده يبقى ده اسمه تخاذل واني بدي للعدو “اسرائيل” حجة ومبرر لقتل أهلي في فلسطين.

رابعا والله أنا مش ماشي مع موجة, حضرتك اللي ماشي مع الموجه اللي صدرها الإعلام اللي أنا شغال فيه وعارفه كويس أكتر من حضرتك, وبلمناسبة مفيش أي دليل لغاية انهارده على تورط حماس في أي جريمة ضد المصريين, كله كلام وبيتقال وبس. .. وكلام حضرتك كله نفس الجمل المكررة المبتذله اللي بتتقال وبسمعها كل يوم وغير مبنية على أي أساس موضوعي ولا على حقايق. وياريت تفكر في أخر نقطة دي كويس.

خامسا, كون ان حضرتك ماسمعتش عن أي “حمساوي” استشهد, فده لأنك بتتابع إعلام الاتجاه الواحد ومش بتشوف أي وجهه نظر تانية, أو حتى إعلام موضوعي, حضرتك بتسمع الكلام اللي بيريح عقلك وبيعفيك من التفكير, وبتأيد شخص مطلقا وبتعادي مجموعة مطلقا.

سادسا واخيرا, مع كامل احترامي لحضرتك, أنا اللي واجهت الإخوان طول سنة وقبلها سنتين بوجه مبارك والمجلس العسكري, وانا اللي اتعرضت للأذى على اديهم, ومش أنا أبدا اللي بجاهد من بعيد لبعيد.

أخيرا, أرجوك لو حضرتك تحب اشرحلك الوضع في فلسطين أنا مستعد في أي وقت, ولو تحب تعرف أكتر عن الوضع في سينا أو عن أي حاجة أنا مستعد برضه, لسبب بسيط, لاني فعلا عندي معلومات أكتر من حضرتك لطبيعة شغلي ولاني روحت الأماكن دي وتعاملت مع كل الأطراف على مستويات مختلفة من اصغر حد لأعلى حد.

وكون ان حضرتك بتقول اني جبت الشتيمة لأهلي, ف والله أنا بحترم الناس وبكتب رأيي باحترام وكل كلام بيعبر عن صاحبه, ولأن حضرتك بتتعامل بنفس المنطق مع كل شيء ولأنك شايف ان الفلسطينيين غلطانين بالرغم من كونهم الضحية, فأنت برضه شايف أن أنا اللي غلطان بالرغم من كوني الضحية واللي اتشتمت.

حضرتك لسة مؤمن بمبدأ المشي جنب الحيط, وأنا ولا مشيت ولا همشي جنب الحيط.

تصبح على خير يا عمو, وأسف لو كلامي هيزعجك ولكني حبيت أوضحلك حقايق, واهتميت بالرد وكتبت كل ده لأني بعتز بصلة القرابة اللي بينا, وواجب عليا أوضح لحضرتك اللي متعرفهوش.

سبب الرسالة:

https://www.facebook.com/Kareem.Emad.Farid/posts/10152544640885979

Categories:   ثورة مصر

Comments

Leave a Reply